Nos direktiva

‘Stichting Brisa’ ta konsistí di e siguiente miembronan:

Karen Tromp-Hunte

Karen Tromp-Hunte

Presidente

Karen Tromp-Hunte a nanse na Kòrsou i a biba te ku su 10 aña na Sint Maarten. Despues e a muda pa Kòrsou kaminda e a optené su diploma di VWO na Radulphus College. Ku 18 aña, Karen a muda pa Hulanda, pa studia Bedrijfskunde, spesialisando den International Business na Rijksuniversiteit Groningen (RUG). Despues di su estudio, e a okupá diferente funshon den gobiernu hulandes. For di 2015 e ta traha na munisipio di Groningen. E ta forma parti di un ekipo ku ta traha pa prevení abuso di mucha i tambe komo konsehera i kordinadora di e departamentu ku ta enfoká riba hoben adulto (18/18+ aña).

“Mi ta kasá i mi ta mama di 2 yu chikí. For di 2009 mi ta forma parti di ‘Stichting Brisa’ i for di 2011 mi ta okupá e posishon di Presidente di e fundashon. Pa mi ta sumamente importante pa partisipá aktivamente den e komunidat, kompartí mi eksperiensia i konosementu i tambe yuda otronan. Na momentu ku nos a wòrdu aserká dor di e alkalde di Groningen pa forma un direktiva di konseho, di i pa personanan Hulandes-Karibense, mesora mi a bisa ‘si’. Ku e idea pa yuda nos hendenan i tambe pa demostrá ku nos ta mas ku loke prensa ta menshoná. Nos ta hendenan kreativo, amikal, alegre i sabí!”

Swinda Stamper

Swinda Stamper

Vise-Presidente

Swinda tabata tin un hubentut bunita i trankil na Aruba. Semper e tabata sa ku e lo bandoná su isla i bai biba afó pa asina por yuda kaminda ta nesesario. Un di su metanan tabata pa semper tin un funshon di maneho. Na 1987 Swinda a muda pa Hulanda i mesora a kuminsa studia ‘Commerciële Economie’. Despues di a terminá su estudio, e a sigi su pashon ku ta moda i maneho. E a finalisá e estudionan ‘Mode en Kleding’ i tambe ‘Ondernemerschap’ ku éksito. Despues di esaki, e a sigi diferente estudio kortiku i kurso.

“Semper mi tabata tin e pashon pa logra kosnan den bida. Mi gusta adrenalina! Mi agènda semper ta un tiki dimas yen. Mi tin mi mes empresa, mi ta Presidente di mi mes fundashon, mi tabata Vise-Presidente i despues Presidente na ‘Platform Zelforganisaties’ pa 10 aña, Vise-Presidente na ‘Stichting Brisa’, miembro di direktiva di WMO i tambe miembro di direktiva di diferente organisashonnan, manera FNV vrouwen Noord. Na aña 1989 mi a disidí ku mi ke kontribuí na mi komunidat. Te ku awe mi ta hasi esaki ku masha plaser. Si bo por yuda un persona tur dia i hasi e kontentu, pakiko lo bo no hasi esaki?”

Ayschlaine Profas

Ayschlaine Profas

Tesorero

Ayschlaine a nanse i a biba na Kòrsou te ku su 27 aña. E a muda pa Hulanda pa sigi su estudio i despues di a obtené su diploma e a disidí di keda na Hulanda. Ayschlaine ta kasá, e tin un yu muhé di 6 aña i e ta biba na Beijum, Groningen.

“Aktualmente mi tin mas ku 10 aña ta biba den e komunidat hulandes. Mi konosé e desafíonan (por ehèmpel ora di buska trabou) ku nos ta wòrdu konfrontá ku ne ora bo ta un imigrante. Mi gusta yuda otronan ku tambe a imigrá. Esaki tambe ta e motibu pakiko mi a forma parti di ‘Stichting Brisa’. Aparte di yuda otro personanan Hulandes-Karibense, tambe mi ke krea mas konekshon ku nos hendenan. Komo Tesorero di ‘Stichting Brisa’ no ta semper mi tin kontakto direkto ku nan. Mi ta yuda mi koleganan ku ta den e fundashon fasilitando nan pa nan por trata e preguntanan i problemanan di e personanan Hulandes-Karibense, ku gobiernu di Groningen i otro institushonnan tin. Esaki mi ta hasi ku hopi plaser!”

Dudley Sambo

Dudley Sambo

Miembro di direktiva

“For di un edat hopi yòn mi tabata tin e pashon pa yuda otronan. Mi ta disfrutá enormemente ora mi kompartí mi konosementu, eksperiensia, talentonan i pashon na un meta ku ta motivami. ‘Stichting Brisa’ tin hopi oportunidat pa hasi esaki. Pesei mi a bira miembro di e fundashon aki.” Nèt despues ku Dudley a yega Hulanda den 1993, e a forma parti di diferente organisashonnan na Groningen pa asina por yuda personanan Hulandes-Karibense den un manera òf otro.

Diesun aña pasá, ora ku Dudley a wòrdu invitá dor di munisipio di Groningen pa kuminsá ku un direktiva di konseho spesialmente pa personanan di desendensia antiano na Groningen, mesora e a bisa si. For di e momento ei e ta forma parti di ‘Stichting Brisa’, ku a wòrdu establesé ofisialmente 10 aña pasá.

Davally Marcos

Davally Marcos

Miembro di direktiva

For di 1998 Davally Marcos ta biba na Hulanda. E ta kristian i tambe e ta forma parti di un iglesia. Na 2014 e a wòrdu aserká pa hasi anotashon pa ‘Stichting Brisa’. Dos aña despues e a tuma e desishon pa bira miembro di direktiva, paso e ke informá i yuda nos komunidat kaminda ta nesesario.

“’Stichting Brisa’ a wòrdu lanta pa advisá gobiernu tokante e nesesidatnan di nos hendenan. Tambe nos ta yuda forma e maneho. Den e ultimo añanan a bin algun kambio den esaki i nos a disidí kambia nos vishon dor di enfoká mas riba e nesesidatnan di e komunidat antiano/arubiano. Nos no ke organisá solamente eventonan informativo, pero tambe nos ke yuda nos hendenan te kaminda nos por. Nos no ta trahadó sosial, pero nos ta konsehá personanan i famianan ku tin difikultat den e proseso di imigrashon. Ta pesei ta importante pa nos keda traha huntu, yuda otro i keda den e lus positivo. Union ta hasi forsa.”

“Nos ke demostrá ku nos ta mas ku loke prensa ta menshoná. Nos ta hendenan kreativo, amikal, alegre i sabí!”

Karen Tromp–Hunte